Meiner datasenterboom gir høgare straumprisar

(NPK-NTB) Straumforbruket til datasenter i Norden kan firedoblast innan 2032, ifølgje tal frå Bloomberg Intelligence.

Norden kan bli ein ynda stad for datasenter å etablere seg i åra framover, på grunn av kaldt vêr og låge straumprisar, skriv Bloomberg. 

Ifølgje Bloomberg Intelligence-analytikarane Joao Martins og Patricio Alvarez kan det regionale straumforbruket i dei nordiske landa auke med 14 til 19 prosent årleg som følgje av etableringane. Dette er langt høgare enn gjennomsnittet i EU.

Interessa kan gi stor vekst for aktørar som Vattenfall, Statkraft, Fortum og Ørsted. Samtidig kan den auka etterspurnaden svi i lommeboka for forbrukarane, som i dag nyt godt av Europas billigaste straum. 

– Straumprisnivået vi har i Norden vil over tid i aukande grad nærme seg prisnivåa elles i Europa, seier energiekspert Oskar Almén i PA Consulting, til Bloomberg.

Inntoget av datasentera i Noreg er allereie i gang for fullt. I sommar kunngjorde Aker ei milliardsatsing på KI i Narvik, som har fått namnet Stargate Norway. I samarbeid med OpenAI og prosessorkjempa NVIDIA skal Aker og britiske Nscale etablere eit stort datasenter for kunstig intelligens i Narvik. Onsdag førre veke inngjekk selskapet ein KI-avtale verdt 60 milliardar kroner med Microsoft. 

Satsinga har skapt politisk debatt på bakgrunn av det høge straumforbruket slike datasenter krev.

(©NPK)