Børsdagen: Opptur for Atlantic Sapphire

Sjå børstabell for Nordvestlandet under saka

Atlantic Sapphire steig kraftig då handelen opna på Oslo børs torsdag. 

Ved stengetid var kursen opp nær 23 prosent til 11,49 kroner. Nivået er framleis 37 prosent under kursen ved årsskiftet. 

Bakgrunnen for kurshoppet var ei oppdatering selskapet kom med seint onsdag. Rapporten for 2. kvartal er utsett og kjem først søndag 31. august. 

Oppdateringa viste betring både for økonomien, drifta og den biologiske utviklinga for fisken – etter at selskapet i fleire år har vore plaga av ulike utfordringar. 

Omsetninga i første halvår blei om lag dobla samanlikna med første halvår i 2024, til 21,5 millionar dollar – om lag 220 millionar kroner. 

Det same var tilfellet for den gjennomsnittlege slaktevekta som i 2. kvartal var oppe i 3,1 kilo. Slaktevolumet enda på 2486 tonn – opp frå 2384 første halvår i fjor. 

«Første halvdel av 2025 representerer et vendepunkt for Atlantic Sapphire. Driften er nå stabil, den biologiske ytelsen er på rekordnivåer, og de økonomiske resultatene forbedres raskt», uttaler administrerande direktør Pedro Courard i meldinga. 

Det er likevel eit stykke fram til at selskapet går i balanse. Målet no er å levere første positive EBITDA – driftsresultat før avskrivingar – innan utgangen av 2026. 

Endúr-konsernet leverte sin rapport frå 2. kvartal tidleg torsdag, som viste vekst og betra lønnsemd. Investorane svara med å sende kursen opp. Ved stengetid var Endúr-kursen opp drygt seks prosent til 92,60 kroner. 

Litt seinare kom også Havila Shipping med sin halvårsrapport, som viste stø kurs for reiarlaget. Investorane reagerte med å sende kursen ned kring to prosent.

Hovudindeksen på Oslo børs fekk ein oppgang i løpet av dagen på 0,76 prosent til 1657,37. Det er ny rekordnotering. 

Børstabell for Nordvestlandet: