- Dei beste karta hittil i Norge

- Dette er dei beste karta som nokon gong er vist i Norge. Folk og fiskarar som har fått sett dei er veldig begeistra.
Dette seier dagleg leiar Nils-Roar Hareide ved Runde Miljøsenter, som har vore ansvarleg for koordinering av prosjektet.

Ser tyske flyvrak

Karta vil verte presenterte fredag under eit møte på Hareid. Der stiller Sigrid Elvenes og Oddvar Longva frå Norges geologiske undersøkelsar (NGU) saman med representantar frå Runde Miljøsenter og kommunane som er med i prosjektet.
.
Det er NGU som er ansvarleg for prosjektet, der karta får svært høg oppløysing.
'- Her får du sjå detaljar på havbotnen som ingen har sett før, seier Hareide.
Han viser til eit eksempel på eit skuggerelieffkart over Åramsundet mellom Sande og Vanylven.
- To tyske vrak er no komne til syne på botnen. Her går skipsleia gjennom trange kløfter, og den kraftige straumen lager bølgemønster i sanden på havbotnen, seier Hareide.

Søre-Sunnmøre

Karta er baserte på djupnedata frå Kartverket, og blir grunnlaget for ei rekke andre kart som NGU lager i samarbeid med kommunane Hareid, Ulstein, Herøy, Sande og Vanylven.
Karta dekkjer mesteparten av sjøområda i kommunane, og Runde Miljøsenter har ansvar for koordinering av prosjektet.
NGU finansierer 50 % av kostnadene, medan kommunane og Fylkesmannen i Møre og Romsdal betalar resten.
Prosjektet starta med at Møre og Romsdal Fylkeskommune finansierte eit forprosjekt der Høgskolen i Ålesund, Møreforsking, Bioforsk Tingvoll og Runde Miljøsenter var med.
Søre Sunnmøre er det første området i landet som får tilgang til kart over sjøbotnen med 1*1 meters oppløysing.