Farstad heilt ute av Solstad

I starten av 2018 hadde familieselskapet Tyrholm & Farstad fire millionar aksjar i Solstad Offshore. Det utgjorde ein post på 1,37 prosent av alle aksjane i selskapet og hadde ein kostpris på 12,50 pr. aksje.
I vår blei det kjent at Tyrholm & Farstad hadde seld rundt halvparten av aksjane, og etterkvart blei alle aksjane selde. Det skjedde "for ei tid tilbake", seier Sverre Farstad. Snittprisen ved salet var i underkant av seks kroner pr. aksje, seier han.

Også mindre aksjepostar familiemedlemer eigde direkte er seld.

Verdifall

Etter at Farstad selde seg ut har kursen i Solstad Offshore falle vidare. I dag melde selskapet at det ber obligasjonseigarane om å utsette alle krav til 20. desember 2019.

Solstad har tidlegare i haust varsla at det må gjennom ei ny forhandlingsrunde med kreditorane og dagens melding utløyste liten reaksjon på børsen. Klokka 12.55 var kursen 2,06 kroner pr. aksje, opp 1,48 prosent samanlikna med sluttkursen i går.
Farstad er ikkje forbausa over at det blir ei ny runde med kreditorane.
- Det skjer det som eg trudde skulle skje, seier han.

Droppa auke

Under refinansieringa vurderte Farstadfamilien å gå inn med ytterlegare 50 millionar kroner i det samanslåtte selskapet SolstadFarstad (som no heiter Solstad Offshore).
Men då Sverre Farstad i januar i år såg at samanslåinga enda med at mesteparten av arbeidsplassane ved kontoret i Ålesund blei lagt ned blei ytterlegare investeringar avlyst.

Farstad trekte seg samstundes frå styret i SolstadFarstad og ba også om at Farstad-namnet blei tatt ut av namnet på selskapet.