Scana Volda-eigar refinansiert

"Refinansieringen er avgjørende for selskapet i forhold til fortsatt drift", heitte det i årsrapporten for Scana Industrier som kom ut februar i år.
Lånavtalen med bankane gjekk ut 22. mars, og sidan har konsernet arbeidd på overtid for å få ei ny avtale på plass.
I dag kom børsmeldinga om at konsernet kom i mål, inntil vidare.

Ny eigenkapital

Dagens eigarar får tilbod om å skyte inn inntil 100 millionar kroner i ny eigenkapital. Til saman vil kapitalutvidinga og ny låneavtale tilføre konsernet 110 millionar kroner.
For å få refinansieringa på plass må det etablerast eit garantisyndikat som garanterer at det minst blir skote inn 50 millionar kroner i nye eigenkapital.
Ei ekstraordinær generalforsamling 26. mai skal avgjere om det blir kapitalutvidning eller ei.

Viktig i Volda

Gir- og propellprodusenten Scana Volda er det største og viktigaste selskapet i Scana Propulsion, som i sin tur er eit dotterselskap i Scana Industrier. Selskapet er og største industriarbeidsplass i Volda.
Konsernet offentlegjer ikkje tal for Scana Volda, men tala for Scana Propulsion viser driftsinntekter på 331 millionar kroner og eit drifsresultat på minus 19 millionar kroner i 2014. Tilsvarande tal for 2013 var 345 og minus 42 millionar kroner.
For fjerde kvartal 2014 er tala for Scana Propulsion enda mindre presise, men viser uansett framgang både i sal og lønsemd. Driftsinntektene auka frå 73 millionar kroner i 2013 til 84 millionar i 2014, og resultatet før finanspostar, av- og nedskrivingar (EBITDA) endra seg frå minus 12 til pluss tre millionar kroner i same periode.