Fleire investorar på Nordvestlandet har deltatt i den retta emisjonen som det Ulsteinvik-baserte seismikkselskapet Axxis Geo Solutions har gjennomført.
I tillegg til emisjonskapitalen, har selskapet også styrka seg med 32,1 millionar kroner ved at uteståande warrants vart utøvd.
Dette kjem fram i ei orientering til aksjonærane.

Sævik og Romestrand

Store eigarar i selskapet er Arne Blystad og Songa Invest, samt Houston-baserte Bjarte Bruheim.
Størst av aksjonærane frå Nordvestlandet er Sævik-familien gjennom Havila Holding i Herøy og Jogeir Romestrand i Ulsteinvik. Også Herøy-selskapet Remøy Shipping er inne på eigarsida.
Axxis Geo Solutions satsar stort på nodeseismikk, og selskapet sin sjølveigde båt Neptune Naiad fekk oppdrag for BP utanfor Indonesia tidleg i fjor.

India-gjennombrot

Men det store gjennombrotet kom då selskapet fekk kontrakt med det India-baserte multinasjonale selskapet Oil and Natural Gas Corporation (ONGS) om nodeseismikk utanfor India.
Samla kontraktssum for dette oppdraget er på 830 millionar kroner (99,9 millionar USD), der rundt 70 prosent av inntektene går til Axxis.
Her har Axxis leigd inn skipa Geo Caspian, Havila Fortune og Pasific Finder, i tillegg til Neptune Naiad.
Men selskapet satsar også stort i Nordsjøen, og har på Utsira henta inn seismikkdata frå eit område som dekker 1560 kvadratkilometer, i eit prosjekt som Aker BP sponsa med 40 millionar USD.

Strategisk samarbeid

Deretter kom seismikk-kjempa TGS – Nopec Geophysical på bana, og inngjekk partnerskap med Axxis om å dekke sentrale deler av Nordsjøen med nodeseismikk, inkludert Utsira-feltet.
Avtalen inneber også sal av 50 prosent av seismikkbiblioteket til TGS, truleg til ein pris som ligg rundt 250 millionar kroner.
I Nordsjøen har ein i tillegg også leigd inn Gjerdsvik-skipet Sanco Sword.

Investeringar for 97,9 millionar

Satsinga i Nordsjøen har resultert i store utgifter til innkjøp av noder og anna utstyr.
Totalt gjorde selskapet investeringar i fjor for 97,9 millionar kroner, der 66,5 millionar galdt nodehandteringsutstyr og 27,8 millionar seismikkutstyr.
Selskapet omsette i fjor for 178,9 millionar kroner i fjor. Av- og nedskrivingar på totalt 104,2 millionar kroner gav ei raud botnlinje.
Selskapet hadde ved årsskiftet ei kontantbehaldning på 66,9 millionar kroner, og har no styrka seg ytterlegare gjennom kapitalinnhenting.