Kraftig auke i oljeinvesteringar

NPK-NTB: Oljeinvesteringane skal auke til 184,5 milliardar kroner i år. Norsk olje og gass ventar at investeringane skal halde seg høge i fleire år framover.
Anslaget til organisasjonen viser at investeringane i petroleumssektoren i år kjem til å liggje endå høgare enn det som var venta berre for eit par månader sidan. Eit investeringsnivå på 184,5 milliardar kroner er 25 milliardar kroner høgare enn det som kom fram i prognosane til Statistisk sentralbyrå (SSB) i november i fjor.
Veksten i feltinvesteringane aukar med 8 prosent til 152 milliardar kroner. I tillegg kjem investeringar i røyrtransport, landsverksemd, leiting og konseptstudiar, ifølgje prognosane Norsk olje og gass la fram måndag formiddag.
Investeringsnivået kjem til å halde seg høgt i fleire år framover, trur organisasjonen. Men administrerande direktør Karl Eirik Schjøtt-Pedersen er bekymra for uvissa som er skapt om skatteregimet oljeverksemda er underlagt.
– Dersom det oppstår uvisse om kva rammevilkår som skal gjelde, vil store delar av desse investeringane kunne bli avlyste eller utsett. Då vil investeringane falle dramatisk. Det vil få konsekvensar for titusenvis av arbeidsplassar og for inntektene til staten, hevdar han.