Norsk økonomi voks 0,4 prosent i januar

(NPK-NTB): Nasjonalrekneskapen viser at bruttonasjonalprodukt i Fastlands-Noreg voks 0,4 prosent frå desember til januar.

Varehandelen og straumnæringa trekte opp, skriv Statistisk sentralbyrå (SSB).

– Veksten i januar kom etter ein nedgang månaden før. Sett i stort er det underliggjande biletet at økonomien utviklar seg tilnærma flatt, slik han har gjort det siste året, seier seksjonssjef for nasjonalrekneskapen Pål Sletten.

Konsumet i hushalda gjekk ned 0,4 prosent, trekt ned av eit fall i bilkjøp.

– Uvanleg mange kjøpte bilar under koronapandemien og i slutten av 2022. I tillegg er bilkjøp lettare å utsetje enn mykje anna konsum no når levekostnadene er høge, seier Sletten.

Tala er sesong- og kalenderjusterte. Sidan desember er ein månad med mange fridagar, men også mykje julehandel, er det vanlegvis mykje svingingar i nokre tal, som kan føre til ekstra uvisse rundt den økonomiske utviklinga.

Fiske og fangst trekte også ned, i tillegg til at bustadinvesteringane i hushalda heldt fram med å falle. Samtidig voks bygg- og anleggsverksemda litt i januar.

Det var stort sett flat utvikling blant tenestenæringane og industrinæringa.

(©NTB)