Ørskog får mest til gang- og sykkelveg

NPK-NETT NO: Regjeringa gir støtte til 58 tiltak som skal føre til meir sykling og gåing på fylkeskommunale og kommunale vegar i 2019.
Støtteordninga blei etablert i 2014 og skal bidra til å auke satsinga på sykling og gåing. Alle fylkeskommunar og kommunar var inviterte til å søke, og midla kan mellom anna brukast til sykkelfelt, sykkelparkering eller gang- og sykkelveg. Søkarane må bidra med 50 prosent eigendel.
– Vi ønsker å legge til rette for at fleire tar beina fatt eller syklar når dei har høve til det. Da skaper vi betre mobilitet og miljø, i tillegg til betring av folkehelsa, seier samferdselsminister Jon Georg Dale i ei pressemelding.
Regjeringa delar ut totalt 78,5 millionar kroner for 2019.
I nordvest får Ørskog kommune 4,6 millionar kroner til gang- og sykkelveg.
Ulstein kommune får 1,3 millionar kroner til fortau langs Søylesvingen, medan Eid, Volda og Ørsta får midlar til sykkelparkering.
Herøy kommune får 1,1 millionar til gang- og sykkelveg gjennom Fosnavågparken.
Også Møre og Romsdal fylkeskommune får støtte, blant anna til sykkelparkering, varsling av syklist i tunnel og skilting av sykkelrute i Ålesund.