Per Sævik: - Går ikkje dette, beheld vi Havyard sjølve

- Ja, det er heilt uaktuelt å selje seg ned til 33 prosent til ein slik pris, men etter råd frå tilretteleggjerane har vi gått med på å selje oss ned så mykje at det vert over 25 prosent aksjar fritt tilgjengelege, seier Sævik.
Tilretteleggjarane er Arctic Securities og Fernley Securities.
Målet var å få med seg investorar slik at Havyard Group ved ein børsintroduksjon vart prisa til ti rundt 1,1 milliardar kroner. Dette ville ha prisa Havila Holding sine aksjar til vel 900 millionar kroner ettersom selskapet eit 82,1 prosent av aksjane i selskapet.
Men det viste seg å vere vanskeleg å få inn pengar til ei prising på over milliarden for det Herøy-baseret selskapet.

Mange slit

Per Sævik seier at han ikkje er så skuffa, sjølv om han overfor NETT NO tidlegare har uttalt at familien hadde sett smertegrensa til ein milliard kroner.
- Nei, det har vst seg at fleire andre selskap i det siste har måtta avlyse børsnotering ettersom det har vist seg vanskeleg å få inn midlar.
Han gjer det likevel klart at dersom ein ikkje lukkast med det skisserte opplegget, vil ein avlyse planane om børsnotering og halde fram med dagens eigarskap.
- Ja, om vi ikkje får det til no til ein så lav pris, så beheld vi det sjølve.

Seinare nedsal

Det skisserte opplegget inneber at Havila Holding framleis vil vitje att med over 60 prosent av aksjane i Havyard Group.
- Vi får sjå etter børsnotering om det vert mogleg å selje seg vidare ned seinare til ein høgare pris, seier Sævik.
Sjølv om han ikkje legg skjul på at det er ein billeg aksje som no vert lagd ut til sals, seier han at det ikkje var mogleg å få ein høgare pris for selskapet no.
- Det er marknaden som set prisen. Slik er det.

Lokkar med utbyte

Sævik reknar med at det skisserte opplegget kjem til å lukkast.
- Ja, det trur vi på. Det kan truleg også hjelpe på interessa at det kjem til å verte betalt ut eit betydeleg utbyte i tredje kvartal.
- Kor stort kan det verte?
- Vi snakkar nok om over 50 millionar kroner, seier Sævik.