Tysk Hexagon-avtale

Hexagon Composites sitt tyske dotterselskap xperion Energy & Environment flaggar sin andre kontrakt på få dagar.
Først gjekk det Kassel-baserte selskapet inn ein avtale om levering av store gasskontainerar i Pakistan. No melder selskapet om ein stor ordre til tyske Air Products GmbH.
Kontrakten gjeld leveranser av høgtrykks hydrogenbehaldarar til trailerar for transport av hydrogen til industrielle mottakarar.

Aukande interesse

Hexagon opplyser i ei børsmelding at ein merkar aukande interesse for å erstatte dagens stålbehaldarar med behaldarar i komposittmateriale, både på grunn av vekt, sikkerheit og design.
- Vi er alltid ute etter å implementere innovative teknologiar. Gjennom å ta i bruk solide og lette komposittløysingar for våre transporteiningar, innfrir vi strenge standardar innanfor miljø og sikkerheit, og forbetrar vår operasjonspraksis, seier direktør Thomas Hollad ved Air Products.
Leveransen vil skje i løpet av første og andre kvartal i år.