Siste vekene har det vorte sett rater i Nordsjøen som ein må langt tilbake til å finne maken til. For større PSV-ar har ratene lagt seg på stabilt høgt nivå, medan det også har vore periodar med høge rater for ankerhandterar.

Dette har ført til litt fornya optimisme for offshorereiarane, der fleire no er i knallharde forhandlingar med kreditorane for å få i hamn avtalar som sikrar vidare drift av selskapa.
Blant anna gjeld det Solstad Offshore og Havila Shipping.

Alle aktørane forventar betre tider i offshore, inkludert for dei som som forsyner marknaden med skip. Det meiner også Rystad Energi vi no får. Men oppturen vert kortvarig, og ifølgje Rystad er det ikkje så langt unna ein ny topp.

Svakare vekst i oljeservice

I frå selskapet vert det spådd at servicemarknaden vil redusere veksten frå sju prosent årleg vekst i perioden 2019 - 2022 til berre tre prosent vekst frå 2022 til 2025.
Analyseselskapet viser til at dagens vekst var venta på grunn av auken i oljeprisen og auka investeringar av oljeselskapa med tilhøyrande høgare produksjon, men at den nye produksjonen på nytt vil presse prisen og investeringane ned.
Blant anna vil det kome 5 millionar fat olje frå nye felt i 2022 frå investeringar vedtekne i 2018 og 2019.
I tillegg forventar ein at fire vekstår på rad vil auke inflasjonen i mange av serviceområda.

OPEC og Russland avgjer

Audun Martinsen, som leier Rystad sin Oilfield Service Research seier at mykje av utvikling er knytt til om OPEC, med støtte frå Russland, vil bestemme seg for å gjere tiltak for å stabilsere marknaden.
- Om gruppa bestemmer som for å fryse produksjon for å halde prisane oppe kan momentumet i offshoremarknaden halde fram. Viss ikkje, vil renessansen innan offshore vere over i 2022.
Rystad forventar no at investeringane i nye offshoreprosjekt vil falle til mellom 70 og 80 milliardar US dollar årleg, noko som er halvparten av forventa investeringar i 2020.
Analysebyrået meiner at den delen av industrien som vil merke vekstbremsen mest, er dei som er mest eksponert mot investeringar i nye feltutbyggingar.
– Først i år vil offshoreselskapa levere omsetningsvekst. Ideelt sett burde det vore fem år med gode prisar, men oppturen vert kort. Skiferoljen har gjort at syklusen vert kortare. Det vert meir start og stopp, seier Martinsen.