15 nye smitta i Ålesund

Ålesund kommune har tysdag 25. mai fått meldt 13 nye smittetilfelle, i tillegg til dei to som var meldt tidlegare i dag. Det er altså stadfesta 15 smittetilfelle i dag. 14 av desse var i karantene, opplyser kommunen i ei pressemelding.

Status er følgjande:

To personar som testa positivt på hurtigtest i går, vart i kveld stadfesta smitta. Ein tredje person i same familie har også fått påvist smitte.

To personar som er karantenesett i samband med smitte ved Jugendteateret, Ålesund kulturskole, har fått påvist smitte med koronavirus. Dette gjer at to 7. klassar ved Flisnes skole kjem i karantene.

Eit barn som var i karantene ved Ebbegarden barnhage har fått påvist smitte.

Seks nære familiemedlemmar til tidlegare meldt smitta har fått påvist koronavirus. Alle var i karantene og er overført til isolasjon.

Ein person har testa positivt på grunn av symptom og er overført til isolasjon. Smittevegen er så langt ukjend.

- Mange er testa og vi opplever igjen høge smittetal. Nesten alle har vore i karantene og fleire er i nær familie med tidlegare smitta. Det er også påvist smitte hos deltakarar ved Jugendteateret, Ålesund kulturskole. Svært mange i denne gruppa er karantenesett på grunn av mogleg smitte, seier kommuneoverlege Olav Mestad.

Dei neste dagane vil avgjere om Ålesund kommune klarer å få kontroll på desse utbrota som er relatert til sosial aktivitet i samband med 17. mai helga:

- Dersom vi skal kunne opne opp igjen samfunnet og aktiviteten lokalt i Ålesund, er det heilt nødvendig at alle følgjer smittevernreglane og avgrensar sosial aktivitet. Møt kvarandre ute med avstand. Ved luftvegssymptom og feber må ein bli heime og bestille ein koronatest, seier Mestad.