Fekk info om konkurrerande anbod

Møre og Romsdal fylkeskommune har avdekka at ein leverandør har fått oversendt prisopplysingar om ein annan potensiell tilbydar i samband med to anbodskonkurransar om asfaltarbeid.

Fylkeskommunedirektøren ser svært alvorleg på hendinga som kan påverke den planlagde dekkelegginga, og saka er meldt til politiet, opplyser fylkeskommunen i ei melding.

Saka blei oppdaga i mars og tilbodsfristen for konkurransane er utsett.

– Fylkeskommunen gjer no nødvendige tiltak for å få på plass kontrakt for legging av asfalt på fylkesvegane i Møre og Romsdal i 2024, uttaler fylkeskommunedirektør Toril Hovdenak vidare.