Fleire heilt arbeidsledige i mai

(NPK-NTB-NETT.NO): 2300 fleire personar var registrerte som heilt arbeidsledige hos Nav i mai, viser nye tal. Totalt var 2 prosent av arbeidsstyrken registrerte som arbeidsledig.

– Talet på heilt ledige auka i mai, for alle yrkesgrupper og i alle fylke. Samtidig er arbeidsløysa framleis på eit lågt nivå, og det blir lyst ut mange ledige jobbar, seier arbeids- og velferdsdirektør Hans Christian Holte i ei pressemelding.

Også i april låg arbeidsløysa på 2 prosent på landsbasis. 

Både i Møre og Romsdal og Vestland låg arbeidsløysa under dette nivået, med høvesvis 1,7 og 1,6 prosent ledige, ifølgje pressemeldingar frå fylka. 

Summen av heilt ledige og arbeidssøkjarar på tiltak var 74.800 personar ved utgangen av mai, som utgjer 2,5 prosent av arbeidsstyrken. I tillegg var 23.200 personar delvis ledige, viser nye tal frå Nav.

98.100 personar, 3,3 prosent av arbeidsstyrken, var registrerte som arbeidssøkjarar hos Nav ved utgangen av mai. Talet på dagpengemottakarar auka med 2900 personar, medan talet på heilt arbeidsledige som får dagpengar, auka med 1200 personar.

Det har vore eit brot i arbeidsløysestatistikk på grunn av at Nav jobbar med innfasing av nye IT-system. Dette påverkar arbeidsløysestatistikken, og det er eit brot i statistikken i april og mai, opplyser Nav. Tala er dermed ikkje direkte samanliknbare med tidlegare månader.

– Når arbeidsløysa aukar, er det fleire som blir ledige fordi dei mistar jobben. Dermed har òg ein høgare del rett på dagpengar, seier Holte.

Arbeidsløysa er høgast i Østfold og Oslo, der ho er på høvesvis 2,6 og 2,7 prosent heilt ledige. Nordland og Troms har lågast arbeidsløyse.