Færre fritidsbåtar på sjøen

Dieselprisane kan ha ført til at gjestehamner over heile Noreg no har færre besøkande med båt, samanlikna med tidlegare høgsesongar.

– Det er mykje mindre folk. Det er halvert frå i fjor, føler me. Det må jo vera prisane, seier Hogne Bertelsen, driftsleiar ved Vassøy Bunkringsstasjon til NRK.

Hamner spreidd over heile landet seier det same: Det er færre fritidsbåtar på sjøen i sommar samanlikna med i fjor.

Folk vurderer å kvitte seg med båten fordi dei ikkje har råd, ifølgje ei gjestehamn. Dei største motorbåtane er ikkje ute i sommar, melder ei anna. Det er for det meste seglbåtar, ifølgje ei tredje.

Felles for gjestehamnene med lågare besøk er at dei trur på ei forklaring: høgare dieselpris.

– Me ser ein tendens til færre båtar og at dei går saktare, fortel Hans Olav Sandvoll, dagleg leiar i Ryfylke Friluftsråd og at det derfor er nærliggjande å tru at diesel- og bensinprisar speler ei rolle. Folk utnyttar truleg dieselen dei har så godt som mogleg.