Hard kamp om miljø-hurtigbåt

Fire leverandørar har kvalifisert seg vidare i konkurransen om å levere miljøvennlege hurtigbåtar til fylkeskommunane Vestland, Trøndelag, Nordland, Troms og Finnmark.

Dei fire er ESNA, LMG Marin, SES-X og Transportutvikling. Leverandørane satsar på batterielektriske hurtigbåtar med ulike skrogdesign: enkeltskrog, katamaran og trimaran.

– Vi er svært glade for å sjå dei gode resultata vi får levert gjennom prosjektet. Fylkeskommunane samarbeider godt og legg til rette for at norsk maritim næring kan ta ei verdsleiande rolle innan grøn hurtigbåtdesign- og bygging, seier fylkesordførarane Jon Askeland (Vestland) og Tore O. Sandvik (Trøndelag) og fylkesrådsleiarane Tomas Norvoll (Nordland) og Bjørn Inge Mo (Troms og Finnmark) i ei pressemelding.

Seks ulike leverandørar har sidan i fjor haust jobba med forslag til løysingar for dei nye hurtigbåtane, og fire går altså no vidare i konkurransen. Målet er å utvikle elektriske nullutsleppshurtigbåtar med minimum 30 prosent lågere energiforbruk enn noverande hurtigbåtar.

Fylkeskommunane vil bruke dei innovative design- og teknologiløysingane som ein mal i framtidige hurtigbåtkjøp, der inntil tre fartøy skal bli bygd og testa.

– Vi ser at det er eit stort teknologisk sprang før vi har dei nye hurtigbåtane på plass i den fylkeskommunale transporten langs kysten vår. Det vil krevje ytterlegare støtte frå statleg hald å få bygt båtane. Samstundes er dette prosjektet eit «kinderegg», der vi får næringsutvikling, klimagevinstar og betre transport, seier Askeland, Sandvik, Norvoll og Mo.