Held fram som Kystdirektør

(NPK): – Arset er ein dyktig leiar og har ført Kystverket gjennom ei viktig omstilling. Han har vore i spissen for arbeidet til etaten med å sørgje for effektiv, sikker og miljøvenleg sjøtransport langs kysten. I ei tid der den sikkerheitspolitiske situasjonen og trusselbiletet har blitt endra og skjerpa så er Arset godt skikka til å leie etaten vidare, seier fiskeri- og havminister Marianne Sivertsen Næss i ei pressemelding frå Kystverket.

Einar Vik Arset har allereie seks år bak seg i stillinga og seier han er glad for å få halde fram i rolla.

– Noreg er ein betydeleg sjøfartsnasjon. 90 prosent av alt gods til og frå Noreg kjem sjøvegen og sjøtransporten er kritisk viktig for norsk verdiskaping. Kystverket skal bidra til sjøsikkerheit, til grøn omstilling og vi er ein vesentleg totalforsvarsaktør, seier Arset.

Arset begynte i jobben som kystdirektør i februar 2019. Han kom då frå stillinga som rådmann i Ulstein kommune.