Håper på sjømatklarering

Tang og tare kan innan eit års tid bli definert som sjømat, håpar prosjektleiar Marit Gjerstad i Norwegian Seaweed Association.

Norwegian Seaweed Association organiserer 28 bedrifter som driv med dyrking av tang og tare, også kalla makroalgar.

– Eg trur at «alle» vil tene på at tang og tare blir definert som sjømat, slik at Sjømatrådet kan byrje å marknadsføre desse produkta. Vi får draghjelp til å selje tang og tare, og Sjømatrådet får ein komplett portefølje med sjømat å marknadsføre ute i den store verda, seier Gjerstad til Fiskeribladet.

Etter det gjeldande regelverket er nemleg ikkje tang og tare definert som sjømat I fiskeeksportlova, og dermed kan heller ikkje Sjømatrådet marknadsføre sjøvekstane.

Ifølgje Fiskeribladet stilte styret i Sjømatrådet seg positiv til å få ansvaret for tang og tare då dei drøfta dette i eit styremøte.

– Styret stilte seg positiv til det, under føresetnad av at Mattilsynet og Nærings- og fiskeridepartementet reknar tang og tare å vere trygg mat for eksport, og at ei slik endring er godt forankra i næringa, skriv direktør for marknadstilgang og marknadsinnsikt i Sjømatrådet Tom-Jørgen Gangsø i ein e-post til Fiskeribladet.

Fiskeriminister Bjørn Skjæran (Ap) har overfor Fiskeribladet signalisert at departementet vil vurdere om makroalgar skal innlemmast i fiskeeksportlova som sjømat.