Kan fiske 315 tonn makrellstørje

Den norske kvoten på makrellstørje blir 315 tonn i 2021. Dette er same nivå som i 2020, og i tråd med gjeldande forvaltningsplan.

– Makrellstørja er svært populær og kallast òg havets Ferrari fordi ho oppnår både høg fart og høg pris. Det er svært viktig at vi også i 2021 har ein romsleg kvote og kan fiske med like mange fartøy som i 2020. Det gjer oss rusta til å fiske heile den norske kvoten, seier fiskeri- og sjømatminister Odd Emil Ingebrigtsen i ei pressemelding.

Noreg har fått godkjent planen sin for å fiske makrellstørje i 2021 av den internasjonale fiskeriforvaltningsorganisasjonen ICCAT. Den norske kvoten for 2021 er opphavleg 300 tonn, men i tillegg har Noreg fått overført 5 prosent unytta mengd frå 2020 til 2021, som gir ein totalkvote på 315 tonn.

Av totalkvoten på 315 tonn er det avsett 15 tonn til bifangst, 10 tonn til merk- og slepp og rekreasjonsfiske og 18 tonn til forsking på levandelagring av makrellstørje. Det er avsett 254 tonn til ringnotfartøy og 18 tonn til linefartøy.

Noreg kan fiske med 8 notfartøy og tre linefartøy i 2021, dette er det same talet på fartøy som i 2020.