Lys kan effektivisere krilfisket

(NPK): Forskingsforsøk viser at kril blir tiltrekt av lys. Kunnskapen kan brukast til å gjere krilfisket i Sørishavet meir effektivt.

Forskarar ved Havforskingsinstituttet har gjort ulike forsøk for å finne ut om lys kan nyttast for å lokke kril til å samle seg.

– Vi ville prøve å forstå meir av åtferda til antarktisk kril, og å sjå om vi kan påverke eller kontrollere den med lys, fortel HI-forskar Bjørn Krafft til instituttet sine nettsider.

Bruken av Led-lys aukar i moderne fiskeri, fordi ein har funne ut at enkelte fiskeartar sym mot lyset, medan andre stikk av. Ein kan altså bruke lys i fiskeriet for å lokke til seg enkelte – og jage vekk andre artar.

Forskarane har no dokumentert at krilen likar lys og den kunnskapen kan gjere fisket betre.

– Det betyr at ein kan bruke lys som eit verkemiddel i kril-fiskeriet, forklarar Krafft.

(©NPK)