Lågaste framtidstru sidan 1992

Trass i gode tider har norske hushalds framtidstru stupt. Ikkje sidan den finansielle krisa i Asia i 1998 har trua på framtia falle så mykje på eitt kvartal.

Det kjem fram i Finans Norges og Kantar Publics forventningsbarometer. Barometeret måler norske hushalds forventningar til eigen økonomi og økonomien i landet og består av fem enkeltindikatorar som blir slått saman til ein hovudindikator.

Hushalda har ikkje rapportert lågare framtidstru på eigen økonomi sidan 1992.

Det kan verke som eit paradoks at forventningane til hushalda fell rekordmykje medan norsk økonomi er inne i ein høgkonjunktur med svært låg arbeidsløyse, påpeikar Finans Norge.

– Folk flest har ein trygg jobb. Mange har også auka bufferane sine gjennom pandemien. Når vi likevel ser eit fall, trur vi det heng saman med uvanleg høg prisauke, særleg på energi, men også på matvarer – og renteauke, seier Idar Kreutzer, administrerande direktør i Finans Norge.