Mange advokatar vil bytte jobb

(NPK): Ei fersk undersøking avslører at 46 prosent av norske juristar har vurdert å slutte i den noverande jobben sin dei siste seks månadene.

Det er det juridiske forlaget Karnov som har teke for seg den juridiske bransjen i Skandinavia. Måndag lanserer dei rapporten «Fremtidens Jurist», som viser at ein oppsiktsvekkjande høg del juristar sit laust i stolen hos den noverande arbeidsgivaren sin.

Ifølgje rapporten har 46 prosent av juristane i Noreg og Sverige vurdert jobbyte dei siste seks månadane, medan 43 prosent av juristane i Danmark har gjort det same. Det er små forskjellar mellom offentleg sektor, privat sektor og advokatfirma. Å få ein betre balanse mellom jobb og fritid og ønskje om meir interessante arbeidsoppgåver blir trekt fram som dei viktigaste årsakene til at mange vurderer å byte jobb.

– Både krav og forventningar har endra seg under pandemien. Mange juristar krev fleksible løysingar og god balanse mellom jobb og fritid. Den høge delen juristar som vurderer å skifte jobb, bør vere ein skikkeleg wake up-call for norske arbeidsgivarar. Dette er særleg kritisk i ein situasjon der det er mangel på juristar hos ei rekkje arbeidsgivarar, seier Hans-Petter Nygård, administrerande direktør i Karnov Group Norway, i ei pressemelding.

Stress i arbeidskvardagen blir trekt fram som ei av årsakene til at mange juristar vurderer jobbskifte. For mange er det å oppnå ein betre balanse mellom jobb og fritid viktigare enn både forfremjing og lønnsauke.

– Det er viktig for arbeidsgivarane å forstå årsakene som ligg bak, for å unngå eit skred av oppseiingar, seier Nygård.

Bransjerapporten «Fremtidens Jurist» byggjer på svar frå meir enn 3.100 heiltidstilsette juristar frå offentleg sektor, privat sektor og advokatfirma i Skandinavia.

(©NPK)