– Må aldri gløyme 22. juli

AUF-leiar Astrid Hoem håpar dei unge som veks opp i dag får lære om kva som skjedde.

– Vi må aldri gløyme, seier ho om terrorangrepa mot regjeringskvartalet og Utøya der 77 menneske vart drepne. Hoem påpeikar at dei unge som veks opp i dag har få, om nokon eigne minner frå den dagen i 2011.

– Det gir eit nytt ansvar i å sørgje for at dei også får lære om kva som skjedde og om kampen vi alle må vere med å ta, seier ho.

Hoem viser til at PST tidlegare har åtvara om at mindreårige blir radikaliserte i Noreg. Det understrekar viktigheita av å lære om 22. juli, meiner ho.

– Konspirasjonar og hat er på frammarsj i både verda og telefonen hos stadig yngre, då burde det blinke litt i varsellampene rundt viktigheita av å lære både om viktigheita av demokratiet og korleis ein kan bruke det, og om kva vi må vite at truar det.

– Terrorangrepet 22. juli er eit dyrekjøpt døme på kva som er konsekvensen viss radikaliseringa går for langt. Det må unge lære om, seier Hoem.

Sjølv skal AUF-leiaren halde tale på minnemarkeringane både i regjeringskvartalet og på Utøya måndag. Det same skal statsminister Jonas Gahr Støre (Ap). Helseminister Jan Christian Vestre (Ap) skal tale under gudstenesta i Oslo domkyrkje.

«Vi glemmer aldri!» er overskrifta på programmet for minnemarkeringane i år, som starta allereie søndag med open dag på Utøya.

I tillegg til dei nasjonale markeringane, som blir sendt direkte, er det lokale arrangement og opne kyrkjer ei rekke stader i landet.

(©NPK)