Noreg har behov for 700 lågutsleppsskip og 400 nullutsleppsskip innan 2030 for å nå klimamåla.

– Ei oppteljing for 2019 viste at vi hadde 189 null- og lågutsleppsskip i norske farvatn; i all hovudsak lågutsleppsskip med LNG eller batterihybridisering, seier Magnus Strandmyr Eide i DNV, eit internasjonalt selskap innan kvalitetssikring og risikohandtering, til Skipsrevyen.

På same tid var det 78 skip med låg- og nullutslepp i ordreboka (med forventa operasjon i Noreg) – noko som indikerer at vi kan forvente å ha rundt 300 skip innan to-tre år, seier Eide.

Dermed manglar vi her i landet framleis 800 grøne skip for å nå klimamåla i 2030.

I oversikta går det fram at det spesielt er fiskeflåten som heng etter. Samtidig viser oversikta at fiskeflåten står for den største delen av skip i ordreboka for grøn ombygging i åra framover. Passasjerferjene leier an både når det gjeld LNG og batteridrift. Fleire offshorefartøy har også lagt om til hybride system og alternativt drivstoff. For våtbulk og tørrbulk er omlegginga framleis liten. Cruiseskipa heng også etter, saman med fiskeflåten. Men både cruise og fiskeflåten forsyner seg godt i ordrebøkene for LNG og batteri i åra som kjem, skriv Skipsrevyen.