Nyss i Stranda og Sykkylven

Nyss blir namnet på den nye avisa for Stranda og Sykkylven, og nettstaden blir nyss.no.

Sykkylvsbladet og Sunnmøringen blir slått saman frå årsskiftet. Lesarar og annonsørar i dei to kommunane vil få eit felles medietilbod med ei papirutgåve onsdag og fredag, i tillegg til løpande oppdateringar på nyss.no.
Medietilbodet vil dekke ein region med om lag 12.000 innbyggarar, og avisa vil truleg få eit opplag på 3.500, blir det opplyst i ei pressemelding.
Mediehuset Nyss AS er ein fusjon mellom Sykkylven Media AS (utgjevar av Sykkylvsbladet) og Sunnmøringen AS. Frank Kjøde, som i dag er dagleg leiar og redaktør i Sykkylvsbladet, får det same ansvaret i det nye mediehuset.
Første utgåve av papiravisa Nyss kjem 6. januar, og nettutgåva blir operativ frå same dato.