Over 500 rike nordmenn i Sveits

NPK-NTB: Det bur over 500 nordmenn med ein formue på over 25 millionar kroner i Sveits, viser ei oppteljing storbanken DNB har gjort.

Alle har over 2 millionar sveitserfranc i plasserbar formue, og i tillegg kjem eigedelar i små og store bedrifter, hytte, hus og båtar, skriv Dagens Næringsliv.

Tidlegare er litt over 80 nordmenn med stor formue vorte kartlagde som kjende utflyttarar til Sveits. Ein går ut frå at halvparten av dei som har flytta til Sveits dei siste to–tre åra, har høge formuar og store verdiar. Ifølgje DNB er ikkje bølgja av nordmenn som har finansiell motivasjon til å flytte til alpelandet, over enno.

– Og det kjem ikkje til å stoppe der. Vi har snakka med fleire som er villige til å ta exitskatten før nyttår eller neste år, seier konserndirektør Håkon E. Hansen i DNB.

– Dette er folk som står opp om morgonen, som jobbar og blir drivne av å få til noko. Det er frykteleg kjedeleg at vi som land mistar slike ressursar. Det kjem til å bli krevjande sett frå eit norsk perspektiv, seier Hansen.