Plantasjen legg ned 14 butikkar

(NPK-NTB-NETT.NO): Plantasjen legg ned 14 av dei 69 butikkane sine i Noreg.

Kjeden har mellom anna avdelingar i Ålesund, Volda og Molde, men ingen av desse blir råka.

Butikkane blir lagde ned for å spare kostnader. Det vil også bli gjennomført nedbemanningar, skriv gartnerikjeda i ei pressemelding.

Opptil 250 tilsette kan miste jobben i løpet av året.

Desse butikkane vil bli lagde ned veslejulaftan i år: Asker, Askøy, Bjørkelangen, Grünerløkka, Kjørbekk, Lund, Lyngdal, Mandal, Mo i Rana, Slemmestad, Steinkjer, Vestby, Østsiden og Øya Larvik.

22. august annonserte kjeda at dei gjennomfører rekonstruksjon i Noreg, Sverige og Danmark.

– Trass i store kostnadstiltak, har ikkje Plantasjen Norge AS oppnådd tilstrekkeleg lønnsemd i ein marknad prega av høg inflasjon, noko som har hatt konsekvensar for både kostnadsnivået og kjøpekrafta til forbrukarane, kjem det fram i pressemeldinga.

Opptil 250 tilsette kan miste jobben i løpet av året. Plantasjen opplyser at tilsette er informerte om prosessen, og at dei samarbeider med fagforeiningar og tillitsvalde.

– Dette er ein tung beskjed å få for dei av våre dyktige tilsette som blir ramma av butikknedleggingane. Samtidig er dette eit nødvendig grep for å sikre Plantasjens framtid i Noreg, seier administrerande direktør Jesper Lien i Plantasjen.