Rekordmange milliardærar

NPK-NTB: Noreg har no 308 milliardærar – og det er blitt 38 fleire av dei sidan i fjor, ifølgje Kapitals årlege oversikt over Noregs 400 rikaste.
Til saman kontrollerer dei 400 rikaste i landet verdiar for 1.349 milliardar kroner, mot 1.181 milliardar kroner i fjor. Formuane har meir enn dobla seg sidan finanskriseåret 2009, då verdiane på lista var 616 milliardar, skriv i sin gjennomgang av tala.
Øvst på lista tronar reiar Jon Fredriksen, som ifølgje magasinet har ein formue på 113 milliardar, opp frå 98 i fjor. Han blir etterfølgd av reiar Torstein Hagen i Viking Cruises, som blir anslått å ha ein formue på 52 milliardar kroner. På tredjeplass ligg Odd Reitan med ein formue på 43,7 milliardar kroner.
Dei neste to plassane har Johan Johannson og Kjell Inge Røkke. Den første kvinna på lista er Margaret B. Garmann, på 23.-plass. Ho blir anslått å ha ein formue på 6,4 milliardar kroner.
Heilt sidan 1998-talet har Kapital laga sin oversikt over dei 400 rikaste i landet. Den baserer seg på gjennomgang av aksjeeigarpostar, eigedommar og andre investeringar.
– 400-lista er altså ikkje ei opplisting av kva middel den enkelte disponerer, men snarare ein oversikt over privat eigarskap, kontroll og makt i norsk næringsliv, skriv magasinet. Det blir understreka at tala på lista berre er anslag.
Ifølgje likningstala hadde Noreg litt over 50 milliardærar i fjor, men desse tala gir heller ikkje eit nøyaktig bilde av dei reelle verdiane folk sit på.