Sett inn vektarar på Trollstigen

(NPK): Turistar tek seg inn til dei verdskjende svingane i Trollstigen trass i sperringar. No er det sett inn vektarar som skal halde folk unna det rasfarlege området.

Trollstigen i Romsdalen har ein million besøkande kvart år, men då ein stein rasa og trefte ein bil på vegen tidlegare i sommar, stengde vegen. Likevel har fleire gåande og syklande turistar tatt seg inn forbi bommen.

No er det sett inn vakter langs fylkesvegen.

– Vi ønskjer ikkje at nokon skal bli skadd om det kjem stein ned frå fjellsidene. Derfor har vi hyra inn eigne vakter til å stoppe folk som går inn sjølv om vegen er stengd, seier fungerande fylkesvegsjef Torgeir Bye til NRK.

Tidlegare i sommar løyvde regjeringa 40 millionar kroner til rassikring av vegen. Når arbeidet med vegen er i gang er det endå farlegare å bevege seg i området.

– Faren er mykje større når vi held på å flytte stein og sånn. Det er fare for at noko dett ned og då ønskjer vi ikkje å ha folk inne i området i det heile tatt, seier Bye.

(©NPK)