Skattelistesøk blir gjenopna

Bakgrunnen er eit forslag frå Raudt i Stortinget om «å begrense skjult eierskap og sikre økt åpenhet om skatt og økonomiske forskjeller». Raudt, SV, Arbeidarpartiet og Senterpartiet stadfestar overfor NTB at dei stiller seg bak forslaget. Dermed er det fleirtal på Stortinget.

Det var E24 som melde om dette først.

– Skattelistene er offentleg informasjon som bør liggje ope tilgjengeleg for alle norske borgarar. Openheit om økonomi og forskjell er ein føresetnad for eit levande demokrati, seier finanspolitisk talsperson for Raudt Marie Sneve Martinussen til NTB.

Fram til skatteåret 2013 kunne kven som helst søkje i skattelistene anonymt og sjekke andre personars inntekt, formue og skatt. Men denne moglegheita vart fjerna av den borgarlege regjeringa, noko som førte til eit kraftig fall i talet på søk.

Dagens regelverk inneber at folk kan sjå kven som har søkt på dei i skattelistene. No blir dette endra igjen.

– Openheit er heilt avgjerande for tilliten til skattesystemet vårt. Arbeidarpartiet og Senterpartiet vil derfor opne for at privatpersonar igjen kan søkje anonymt i skattelistene. Arbeidarpartiet, Senterpartiet og SV stemde imot innstrammingane til Solberg-regjeringa i 2014. Det var fordi vi i motsetning til høgresida var opptekne av å sikre mest mogleg openheit rundt korleis norsk skattepolitikk slår ut for den enkelte, seier Benjamin Jakobsen (Ap) til NTB.

Jakobsen er vara for finanspolitisk talsperson Eigil Knutsen og sit i finanskomiteen på Stortinget. Han viser til at det vart gjennomført 16,5 millionar søk i skattelistene i 2012, men at talet var nede i 1,6 millionar i 2021.

– Dette viser tydeleg at det har vorte mindre openheit rundt skattelistene med politikken til høgresida. Dette ønskjer vi i Arbeidarpartiet å gjere noko med, seier han.

Finanspolitisk talsperson i Senterpartiet, Geir Pollestad, seier at det er viktig å sikre ein god balansegang mellom det å sikre mest mogleg openheit og det å vareta omsynet til personvern.

– Ein gjennomgang av regelverket vil hjelpe oss med å få til den balansegangen på ein god måte, seier han.

– Vi var jo veldig kritiske til innstramminga som Frp gjorde, eit grep vi meiner er uheldig viss ein har som mål å forhindre skattetilpassing og skattesvik. Vi er positive og meiner det er rett å opne skattelistene opp igjen, seier finanspolitisk talsperson for SV Kari Elisabeth Kaski.

Det var Siv Jensen (Frp) som var finansminister då det vart slutt på anonyme søk.

Det er også fleirtal for eit forslag om å skjerpe reglane for openheit om utanlandsk eigarskap i norske selskap, gjennom registeret over reelle rettshavarar.

Dagens forskrift, som nyleg tredde i kraft, legg opp til at berre eigarar som kontrollerer over 25 prosent av eit selskap, vil omfattast av registeret.

– Forslagsstillarane meiner denne grensa er sette altfor høgt til at registeret kan gi presis informasjon om svært mange viktige personar, og at det verkar enkelt å dele opp større eigarskapspostar dersom ein vil unngå registrering, heiter det i forslaget.

Registeret over reelle rettshavarar opnar i løpet av 2023.