Skjerpar avfallshandteringa frå fiske

Forsøpling av hav og ferskvatn truar moglegheitene til framtidig bevaring og utnytting av marine ressursar.

Målet med den nye standarden for handtering av avtall på fiskefartøy er mellom anna å motverka forsøpling til havs og i strandsona, redusera spøkjelsesfiske og bidra til at fleire ressursar blir tekne i land for vidare utnytting. Det går fram av ei pressemelding frå Standard Norge.

– Tanken er at systemet det blir lagt opp til, skal fungera saumlaust saman med dei som tek imot avfall på land. Standarden støttar opp om arbeid knytt til sirkulær økonomi, europeisk plaststrategi og ressursøkonomisering, heiter det i pressemeldinga.

Lanseringa finn stad 24. mars og er retta mot fiskarar, fiskebåtreiarar, leverandørnæringa, utstyrsprodusentar, frivillige organisasjonar, myndigheiter og mottaksapparat på land.