Slit med å få ingeniørar

– Ingeniørkompetanse er ei mangelvare. Mange norske bedrifter sit igjen med uløyste arbeidsoppgåver på grunn av kompetansemangel, seier president i Norges ingeniør- og teknologiorganisasjon (NITO).

NiTOs behovsundersøking blir gjennomført årleg blant ingeniørarbeidsgivarar, i samarbeid med Ipsos. I undersøkinga i år seier 62 prosent av arbeidsgivarane at dei opplever det som vanskeleg å få tak i den ingeniørkompetansen dei har behov for. 45 prosent av dei som slit seier at resultatet er at oppgåver held fram med å vere uløyst.

– Undersøkinga viser at etterspurnaden stig i åra framover, så vi må ta tak no og sikre at det blir utdanna nok ingeniørar. Vi står overfor ei kompetansekrise viss dette held fram, seier president i NITO, Trond Markussen, i ei pressemelding.

Heile 37 prosent av norske arbeidsgivarar svarer at dei vil auke talet på ingeniørar dei kommande seks månadene. 62 prosent seier dei vil behalde dagens tal. Dei neste tre åra trur 59 prosent at dei vil ha behov for fleire ingeniørar. Dette viser at ingeniørarbeidsmarknaden har svært positive framtidsutsikter.

– Dette er svært positive tal. Norsk arbeidsliv skrik etter ingeniørar og vi veit at bedriftene må strekkje seg langt for å sikre seg dei beste hovuda, seier Markussen.