Spekkhoggar-baby arva miljøgifter

(NPK): Da forskarar undersøkte stranda spekkhoggarar som hadde omkomme, fann dei at nye miljøgifter blir overført direkte frå mor til avkom.

Forskarar ved Universitetet i Oslo har undersøkt spekkhoggarar som stranda og omkom i Nord-Noreg, for å finne ut kor mykje miljøgifter dei hadde i seg. Frå ein berre om lag ti dagar gammal spekkhoggar tok forskarane prøver av både hjartet, milten, nyre, lever, musklar og spekk, skriv Teknisk Ukeblad.

Forskarane fann store mengder av «gamle» miljøgifter, stoff som allereie er regulerte, men òg nyare stoff som enno ikkje er forbode å bruke. Det er første gong det er påvist at desse nye miljøgiftene òg blir overførte direkte frå mor til avkom gjennom navlestrengen og gjennom morsmjølka.

Blant desse nye miljøgiftene er til dømes nye variantar av bromerte flammehemmarar, stoff som skal gjere plast, mobilar, TV-ar og PC-ar for å gjere dei mindre brannfarlege.

– Dei eigenskapane som gjer at vi produserer og brukar dei, er dei same som gjer at vi finn dei igjen i miljøet. Dei er kjemisk ganske stabile og blir brotne langsamt ned. Den kjemiske strukturen gjer at dei hopar seg opp i organismar, seier Clare Andvik ved Institutt for biovitskap til TU.no.

(©NPK)