To scenario for sikring av Trollstigen

(NPK): To alternativ for sikringsarbeid i Trollstigen blir vurderte.

Fylkeskommunedirektør Toril Hovdenak har lagt fram to scenario for samferdselsutvalet i Møre og Romsdal fylkeskommune å ta stilling til, skriv Åndalsnes Avis.

Det første alternativet inneber at sikringstiltaka blir gjennomførte i august over tre sesongar, medan vegen held open for trafikk i juni og juli. Dette er estimert til å koste 305 millionar kroner. Det andre alternativet er å stengje Trollstigen heilt i éin og ein halv sesong medan arbeidet går føre seg, til ein berekna kostnad på 247 millionar kroner.

– Omfang, kostnad og framdrift i fjellsikringa er svært usikre, og det må takast atterhald om fleire uføreseielege faktorar, seier Hovdenak til Åndalsnes Avis. Ho nemner endringar i sikringsmengda, vanskelege vêrforhold og større skadar på vegbana som døme.

Samferdselsutvalet skal òg ta stilling til bompengefinansiering av prosjektet. Innstillinga er at fylkestinget gir prinsipiell tilslutning til dette, med atterhald om at Rauma kommune og Fjord kommune òg gir si tilslutning.

(©NPK)