Treng å vite meir om tang og tare

Det er stor interesse for å bruke tang og tare som mat. Men vi veit for lite om kor mykje vi kan ete og kva artar som er trygge. Nokre av artane kan innehalde for mykje av uønskte stoff, viser ein internasjonal rapport Havforskingsinstituttet (HI) har vore med og laga.

HI-forskar Arne Duinker er ein av ekspertane bak rapporten som går gjennom tilgjengeleg kunnskap om tang og tare, og peikar på kva vi må gjere for å finne ut meir.

– Rapporten tilrår meir innsamling av data om kor mykje folk i ulike land faktisk et av dette, og kva ulike artar inneheld av uønskte stoff, seier Duinker i ei sak på nettsidene til HI.

I 2020 analyserte Duinker og forskarkollegaene 27 tang- og tareartar, også kalla makroalgar. Prøvane vart samla inn langs norskekysten, og undersøkte for både uønskte stoff og næringsstoff.

– Fingertare har eit svært høgt innhald av det kreftframkallande stoffet uorganisk arsen samanlikna med andre artar, forklarar forskaren.

Mange tareartar inneheld dessutan for store mengder av næringsstoffet jod, særleg stortare og sukkertare, ifølgje rapporten. På bakgrunn av funna åtvarar Mattilsynet mot å ete fingertare, og tilrår generelt at ein ikkje et store mengder tang og tare.

Elles viste rapporten at tang og tare er rik på kalsium, kalium og gode kjelder til sink, magnesium og jern.

Det er FAO (FNs organisasjon for mat og landbruk) og WHO (Verdshelseorganisasjonen) som står bak rapporten.

– Den nye rapporten vil komme til nytte når det europeiske mattilsynet EFSA neste år skal starte på ei omfattande risikovurdering av uønskte stoff i makroalgar, seier Duinker.