Trugar med å skyte ned dronar

Skipssjef i Kystvakta etterlyser klarare reglar for nærgåande dronar med ukjend eigar og truar med å skyte ned dronar som skaper farefulle situasjonar.

Det er generelt forbode mot å flyge dronar over militære fartøy utan spesielt løyve, men Kystvakta manglar prosedyrar for korleis å handtere nærgåande dronar, seier kapteinløytnant og skipssjef Fredrik Synnes til Sunnmørsposten.

Det er uklart nøyaktig kor nær dronar kan flyge, og kva reglar som gjeld for fotografering av fartøya. Synnes har etterlyst ei oppklaring etter å ha opplevd nærgåande, ukjende dronar fleire gonger.

– I verste fall kan dronar brukast til sabotasje og spionasje, seier Synnes.

Det skal vere ein tryggingsavstand på 150 meter rundt kystvaktskip, som er å rekne som rørleg militært område.

– Dersom ei drone utgjer ein fare, eller vi kjenner oss trua, så kan vi skyte ho ned.