Vil ha høgare fartsgrenser

NPK-NTB: Om få veker kjem Vegdirektoratet med innspel til Samferdselsdepartementet om den høgast tillatne fartsgrensa i landet skal endrast til 120 kilometer i timen.
– Arbeidet med 120 kilometer i timen er i godt i gang og vil sannsynlegvis vere avslutta innan få veker, seier seniorrådgjevar Marius Slinde i Vegdirektoratet til Dagsavisen.
Samferdselsdepartementet har bedt direktoratet om å greie ut 120 kilometer i timen som fartsgrense, både på eksisterande og ny veg. I arbeidet har dei blant anna kartlagt vegane for å kunne vurdere konsekvensane av ei høgare fartsgrense.
Nye vegar AS seier til avisa at dei planlegg å byggje lange strekningar som skal tole 120 kilometer i timen eller høgare, kanskje opp til 130 kilometer i timen. På dei 18 vegstrekningane fordelt på fire utbyggingar blir det lagt opp til minst 110 kilometer i timen, som er den høgste tillatne fartsgrensa i landet.
Det har tidlegare vore kjent at nye E39 mellom Kristiansand og Mandal kan bli den første strekninga i landet med ei fartsgrense på 120 kilometer i timen. Også nye E6 mellom Kvithammar og Åsen i Trøndelag kan vere aktuell for 120 kilometer i timen, har tidlegare omtalt.