Volda-jubel for nye studieplassar

Høgskulen i Volda (HVO) har fått mange nye plassar på studia for etterutdanning av lærarar i 2023. Mellom anna blir dei den einaste institusjonen som tilbyr vidareutdanning for lærarar i kroppsøving 1–10.

Plassane i etter- og vidareutdanningsprogrammet Kunnskap for kvalitet (KFK) blir fordelte til høgskular og universitet over heile landet av Utdanningsdirektoratet (Udir).

– Aldri har vi hatt så mange plassar innanfor vidareutdanning av lærarar og barnehagelærarar. I 2023 har vi 695 KFK-plassar fordelt på 17 tilbod. Tildelingane er svært gledeleg for HVO. Samarbeid og partnarskap med praksisfeltet gjennom tilskotsordningane og vidareutdanningane gir oss viktig røyndom og erfaring. Dette doble formålet trur vi er med på å betre lærarutdanningane og fagmiljø på høgskulen, seier seniorrådgivar Ole Frank Bakken i ei pressemelding.

Avdeling for kulturfag fekk 140 studieplassar, programmering fekk 150 plassar og spesialpedagogikk 70.

Målet med studietilboda gjennom KFK-ordninga er å auke elevane si læring og motivasjon i grunnopplæringa gjennom å styrkje kompetansen til lærarane og rektorane. Studentar som søkjer ordninga, får støtte frå Udir til å gjennomføre utdanninga.