NPK: Kvart år hamnar betydelege mengder smeltevatn frå fisketransport på vegane og kan føre til trafikkfarlege vegforhold og skade miljøet. Samferdselsminister Jon-Ivar Nygård har no bede Statens vegvesen sjå på tiltak for å hindre avrenninga.

– Statens vegvesen har dei siste åra hatt jamlege møte med sjømatnæringa, Mattilsynet, politiet og Norges Lastebileier-forbund, der dette problemet har vore drøfta og ulike løysingar har vore diskuterte. Kontrollar langs vegen viser likevel at det ikkje har vore noka forbetring. Vi må derfor vurdere å stramme inn på regelverket, mellom anna meir effektive sanksjonsmoglegheiter, for å hindre slik avrenning, seier Nygård i ei pressemelding.

Moglege sanksjonar kan mellom anna vere innføring av gebyr som blir pålagt på staden. Det kan òg vere formålstenleg å sjå på korleis andre land handterer reglar rundt dette.