Ålesund-firma konkurs etter oppkjøp

Trafikkservice AS blei slått konkurs måndag etter at styret melde oppbod til Sunnmøre tingrett. 

Selskapet hadde ei gjeld på nær 1,6 millionar kroner og verdiar for 100.000 kroner, ifølgje rettspapira.

Ålesund-selskapet blei tidlegare i år kjøpt opp av Safe24 i Hovdebygda. 

Dagleg leiar Andre Følsvik – som også er sjef i Safe24 – fortel til Sunnmørsposten at dei tilsette får tilbod om jobb i Safe24.

«Det har ikke gått særlig bra, og oppdragsmengden har minket kraftig. Safe24 har tapt en del penger som er skutt inn i selskapet for å prøve å redde det. Men det gikk ikke, og nå måtte vi melde oppbud», seier han til avisa. 

Bjørn-Ivar Borgund er bustyrar i konkurssaka og første skiftesamling er planlagd 18. august. 

Safe24 leverte nyleg eit rekneskap som viste at selskapet hadde eit rekordår i 2024 med ei omsetning på 49 millionar kroner og eit resultat før skatt på nær 12 millionar kroner.