100 millionar til lån til vekstbedrifter

Ein samarbeidsavtale gir Sparebanken Møre garantiar frå Innovasjon Norge for utlån for tilsaman 100 millionar kroner til næringslivet i Møre og Romsdal.

Låna er øyremerka til mindre og mellomstore bedrifter i sterk vekst, og kvart lån kan vere på inntil åtte millionar kroner.

- Gjennom samarbeidet med Sparebanken Møre får fleire bedrifter i fylket auka tilgang til kapital for å vekse og drive innovasjon. Vi ser at mange verksemder slit med å finne investorar som er villige til å ta risiko i ein fase då bedriftene veks mykje og har lite dei kan stille som tryggleik. Difor er vi spesielt glade for å kunne tilby vekstgaranti saman med Sparebanken Møre. Den fyller eit veldig klart behov, seier Helge Gjerde, direktør i Innovasjon Noreg Møre og Romsdal i ei pressemelding.

Tek 75 prosent
Avtalen sikrar at banken får dekt inntil 75 prosent av tapet dersom ein låntakar ikkje greier å gjere opp for seg.

 - Vi har vore med frå starten, og er veldig fornøgde med å få på plass ein ny samarbeidsavtale med Innovasjon Noreg. Avtalen gir oss ein betre moglegheit til å bidra med vekstkapital til raskt veksande og innovative bedrifter i vårt nedslagsfelt, seier Terje Krøvel, leiar for næringslivsmarknad i Sparebanken Møre, i pressemeldinga.

EU på eigarsida
Vekstgarantiordninga er resultatet av eit samarbeid med Det europeiske investeringsfondet (EIF), som er eigd både av EU-institusjonar og private selskap.

Målet er å bidra til entreprenørskap, vekst, innovasjon, forsking og utvikling, grøn og digital omstilling og sysselsetjing. Ordninga nyttar private og offentlege midlar til støtte for ei berekraftig utvikling. Innovasjon Noreg inngjekk eit nytt samarbeid med EIF i 2024 og har lansert ei betydeleg satsing på ordninga.