IKKE BRUK
AVTALE: Pressekonferanse med regjeringspartiene og SV som er samde om straumstøtte. Her Aps energi - og miljøpolitiske talsperson Terje Aasland (t.v) og SVs Lars Haltbrekken. Foto: Lise Åserud / NTB / NPK
Nytt

Ap, Sp og SV samde om straumpakke

Avtalen inneber at staten tek 55 i staden for 50 prosent av straumprisen på kilowattpris over 70 øre.

17.12.2021

NPK-NTB/NETT NO: – Ingen skal måtte fryse seg gjennom vinteren i frykt for høge straumrekningar. Straumpakken som vi no er samde om, skal raskt bankast gjennom i Stortinget. Dermed blir sikra vanlege straumforbrukarar mot ekstreme straumprisar gjennom at staten stiller opp og tek 55 prosent av rekninga for det overskytande når kilowattprisen overstig 70 øre, seier Arbeidarpartiets energi- og miljøpolitiske talsperson Terje Aasland.

Ordninga samla sett er styrkt med 1 milliard kroner, sa han på ein pressekonferansen i dag tidleg.

Omfattar fleire med bustøtte
Ap, Sp og SV er òg samde om at bustøtteordninga skal utvidast slik at rundt 40.000 nye mottakarar kan komme inn i ordninga. Det skjer ved å justere inntektsgrensene og eigendelane.

I tillegg blir formuesreglane endra mellombels slik at fleire som eig bustad, også kan komme inn i ordninga. For eksisterande bustøttemottakarar vil forslaget innebere ei gjennomsnittleg ekstrautbetaling på om lag 1.900 kroner. For nye bustøttemottakarar vil avtalen innebere ei gjennomsnittleg utbetaling på 2.800 kroner.

Partia er samde om at rammetilskotet til kommunane blir auka med 200 millionar kroner for å dekkje meirutgifter til sosialhjelp som følgje av høge straumprisar.

Mageplask
- Dette var eit mageplask frå SV og regjeringa. Staten håvar inn titals milliarder kroner ekstra frå høge straumprisar, og den beheld framleis brorparten av dette. SVs bidrag er å gi nokon større smular tilbake. Dette viser at det er Sheriffen av Nottingham som styrer, ikkje Robin Hood. Sjølv etter SV sine mikroskopiske endringar, vil straummregningane vere ei stor belastning for mange husholdningar. Det er spesielt respektlaust når regjeringa og SV held fram arbeidet for å elektrifisere norsk sokkel med norsk vasskraft, seier stortingrepresentant og energipolitisk talsperson Frank Sve i Frp i ei pressemelding.

Utsett nettleige-ordning
Den nye ordninga for nettleige skal ikkje innførast frå årsskiftet, men utsetjast til våren 2022, ifølgje avtalen om straumpakken mellom regjeringspartia og SV.

Omlegginga av nettleigeordninga skulle etter planen innførast frå 1. januar, men dette er no utsett, opplyste partia på ein pressekonferanse fredag.

– Mange har frykta at den nye nettleigeordninga ville gi auka utgifter på toppen av ei allereie høg straumrekning, sa SVs energipolitiske talsperson Lars Haltbrekken.

Aps energi- og miljøpolitiske talsperson Terje Aasland seier den nye ordninga har vore og er omdiskutert. Mange forbrukarar er usikre på effekten av ordninga og korleis dei skal forhalde seg, påpeikar han.

Partia meiner derfor at det ikkje er formålstenleg å innføre endringa no.

Publisert: 17.12.2021 09:02

Sist oppdatert: 17.12.2021 09:52