Båtentusiasten i Nordfjord

Nordfjordingen John Olav Lefdal stifta Dreamline Yachts i 1999 og har drive sal av det eksklusive italienske lystbåtmerket Riva med stor entusiasme sidan.

Heldigvis for Lefdal har han andre forretningar i botn, som saman med ein god porsjon optimisme har halde båtlidenskapen levande.

No har dottera Miriam etablert seg i Oslo og administrerer kontoret på Tjuvholmen, som er utgangspunktet for både båtsal og charterverksemda i søsterselskapet Riva Italia. Selskapet er medeigar i Riva-forhandlaren i Sverige og vurdere etablering i Danmark. 2020 blir eit rekordår, seier Lefdal.

• Dette er ein artikkel frå NETT NO-magasinet 2020 som ein smakebit for ikkje-abonnentar. Del den gjerne med dei du trur har glede og nytte av å lese oss.

Cruise-satsing

Lefdal vaks opp på Nordfjordeid, bur i Stryn og har familie i Måløy. Han er Nordfjord-patriot på sin hals.

- Dette med Visit Nordfjord med alt i ein fjord, det er eg veldig tilhengar av, seier han.

Både Dreamline Yachts og Riva Italia har hovudkontor på Nordfjordeid, men hovedtyngda av verksemda er i Oslo, der kundemassen er størst.

Den mest synlege delen av verksemda til Lefdal på Nordvestlandet har i heile 2020 lege samanfolda ved terminalkaia på Nordfjordeid, ei cruisekai som kan strekkast ut i sjøen og sørge for at cruiseturistane kan gå i land og om bord.

Han var primus motor for å etablere cruisekaia og er også største aksjonær i Seawalk Nordfjord.

Trur på positiv effekt for Vestlandet

Så langt sytte koronaepidemien for at kaia berre har vore i bruk i debutsesongen 2019, men neste år er det meldt inn 70 cruiseanløp og Lefdal reknar med at dei kjem.

Og uansett kor raskt koronaepidemien blir tilbakelagt, trur Lefdal den har gitt reiselivet på Vestlandet ein varig positiv effekt.

- Eg trur at det som skjedde med korona, det har fått austlendingane til å få augo opp for Vestlandet – og så kjem cruiseturistane tilbake, seier han.

Det betyr både godt betalande nordmenn, og volumet som cruiseturistane syter for.

Starta med øl

For John Olav Lefdal starta livet som forretningsdrivande på eiga hand med at han tok over distribusjonsavtalen for Ringnes i Sogn og Fjordane.

I utgangspunktet var det eit tapsprosjekt, men kom i pluss etter at Lefdal fekk reforhandla vilkåra.

Då lager og distribusjonssentral blei flytta til Stryn fekk han og ein sentral plassering av det økonomisk viktige ølutsalet, som var ein del av verksemda.

I 2010 måtte Nor Drikk ha meir plass, og Lefdal kjøpte det gamle slakteriet på Nordfjordeid, og om lag 8000 kvadratmeter sentrumsnære tomter, ei investering han no meiner har mangedobla verdien, etter oppsvinget Nordfjordeid har fått som handelssenter.