Børsdagen: Fleire fine oppturar

Både Atlantic Sapphire og Havila Shipping var blant børsvinnarane måndag. Havila Shipping steig nye 14,85 prosent til 22,35 kroner aksjen, og har dermed auka verdien med 50 prosent på ei veke. Det er også stor handel i aksjen, utan at det har kome nye meldingar siste dagane.

Fleire andre offshoreselskap har også stige kraftig. Måndag steig Ålesund-selskapet Golden Energy Offshore Services 5,12 prosent.

Fin opptur
Endå meir steig lakseoppdrettaren Atlantic Sapphire, med ein kursauke på 15,10 prosent til 8,50 kroner aksjen. Selskapet har hatt produksjonsproblem, og børsverdien har falle 78 prosent på eitt år, men handelen i dag tyder på fornya optimisme.

For Statt Torsk peika pilane andre vegen, med ein nedgang på 3,24 prosent etter at selskapet melde om at ein er eit halvt år på etterskot i høve til den opprinnelege planen for slakt og sal av oppdrettstorsken.

Vil på børs
Nordvestlandet kan snart få endå eit børsnotert selskap. Ifølgje Finansavisen arbeider Ålesund-selskapet Villa Seafood Group med børsnotering, noko som kan skje allereie i år.

Villa Seafood Group er i dag engasjert i oppdrett av økologisk laks i Skottland, gjennom Organic Sea Harvest. Selskapet har også aksjar i Arctic Filet på Senja. Selskapet vil også ferdigstille en ny filetbedrift på Nittedal i løpet av året.

Hovudindeksen steig 0,79 prosent måndag, medan eitt fat nordsjøolje vart handla ved børsslutt til 88,40 dollar, opp 0,94 prosent