Børsdagen: Ny botn for landbasert oppdrett

Sjå børstabell for Nordvestlandet under saka

Atlantic Sapphire sank til ny botnnotering måndag og vart taparen av dei børsnoterte selskapa frå Nordvestlandet.

Sluttkursen var på 0,95 kroner etter eit fall på drygt 11 prosent i løpet av dagen.

Selskapet som satsar på landbasert oppdrett i USA, har hatt ein rekke problem og henta nyleg inn pengar til ein kurs på 1,2 kroner. I ein rapport om landbasert oppdrett frå Sparebank 1 Markets blir kursmålet barbert frå 1,4 til 0,65 kroner, ifølgje Dagens Næringsliv.

Meklarhuset meiner også at lakseoppdrettsselskapet vil trenge ny eigenkapital på heile 140-150 millionar dollar – eller kring 1,5 milliardar kroner – for å finansiere delar av den planlagde ekspansjonen.

Ifølgje Sparebank Markets må teikningskursen falle til kring 0,3 kroner for at investorane skal vere interesserte. «Lykke til med den», skriv børskommentaren i avisa.

Ifølgje analysen må selskapet både klare å kome i balanse på ebitda – resultat før ned- og avskrivingar – og få på plass ei langsiktig finansieringspakke.

Det andre byggesteget for selskapet er utsett fleire gonger, og no er det anslått produksjonsstart for dette anlegget til siste halvdel av 2027.

Hovudindeksen på Oslo børs fall med heile 0,9 prosent og enda på 1267,61 poeng.

Børstabell for Nordvestlandet: