Børsdagen: Vil låne ein milliard

850 millionar kroner av milliardlånet Hexagon Purus vil ta opp i obligasjonsmarknaden har allereie långivarane på plass.

Blant dei er største aksjonær i selskapet, Hexagon Composites, som vil bidra med 200 millionar kroner, ifølgje ei børsmelding. Mitsui & Co., Ltd har forplikta seg til 500 millionar kroner.

Hexagon Purus lagar tankar og system for bruk av hydrogen som energiberar, i mellom anna skip, lastebilar og tog. Lånet skal finansiere vidare vekst for Hexagon Purus.

Selskapet har auka driftsinntektene med over 60 prosent i årets ni første månadar saman med tilsvarande periode i fjor og selskapet sin ordrereserve ved utløpet av november i år er 1,3 milliardar kroner.

Sjå børstabell for Nordvestlandet under saka

Sparebanken Møre-opptur

Aksjekursen til Sparebanken Møre er på sitt høgaste sidan mars.

Lenge såg 2023 til å bli eit trist år for Sparebanken Møre-eigarane, men opptur på tampen gjer at nesten heile kursfallet på eigenkapitalbevisa tidlegare i år har henta seg inn att. Så langt i år er kursfallet 3,51 prosent.

Til samanlikning har Sparebanken Vest-kursen auka 16,99 prosent og Sparebank1 SMN-kursen auka 8,63 prosent hittil i år.

Onsdag steig kursen til Sparebanken Møre forsiktige 0,15 prosent, til 81,42 kroner per eigenkapitalbevis.

Fredag 24. november i år var kursen ned i 73,7 kroner, som også er årets botnnotering. Etterpå har det gått oppover.

Det er framleis eit stykke opp til årets toppnotering på 88 kroner i starten av mars - og også til kursen ved inngangen til 2023 - 84,41 kroner. Men den negative trenden i store deler av 2023 kan vere broten.