Byggjer ny brønnbåt til kanadaoppdrag

Det Hareid-baserte brønnbåtselskapet Intership har kontrahert ein ny brønnbåt og samtidig inngått ein langtidsavtale med Mowi Canada Øst.
Brønnbåten vil ha ein lastekapasitet på 2.200 kubikkmeter og skal leverast i første kvartal av 2022.

Hareid-meklar

Det nye fartøyet er designa av Harstad-baserte NSK Ship Design og skal byggjast ved verftet Zamakona Yards Bilbao i Spania.
Intership opplyser at byggjekontrakten er framforhandla i samarbeid med skipsmeklaren MIL Shipping ved Arve Holstad på Hareid.

- Det er med stor glede at vi deler denne nyheita, som involverer eit solid antal lokale leverandørar.
- I tillegg til å byggje endå ein brønnbåt, har vi igjen fått fornya tillit hos vår mangeårige kunde, Mowi. Etter at fartøyet er levert vil vi ha to båtar i operasjon for same kunde, på Canadas austkyst, seier adm. dir. Ole Peter Brandal i ei pressemelding torsdag.

Ferskvassanlegg

Selskapet opplyser at i tillegg til å ha fokus på god fiskehelse og å unngå smittespreiing, vil fartøyet utstyrast med eit heilintegrert ferskvassanlegg med stor produksjonskapasitet i forhold til brønnstørrelsen.
Dette blir den andre båten med ferskvasssanlegg til Intership, i tillegg til anlegget på Inter Caledonia, som kom i drift i 2016.
Intership vart etablert i 2014 og vil etter overtakinga av nybygget ha ein flåte på åtte skip.

Over 100 tilsette

Selskapet har hovedkontor ved hurtigbåtkaia på Hareid, og har passert 100 tilsette, der 14 det er tilsette på landsida i Norge, i tillegg til tre tilsette ved avdelingskontoret i Puerto Varas, Chile.
63 av dei tilsette sjøfolka er norske.
I fjor omsette Intership for 223,8 millionar kroner, og sat att med eit resultat før skatt på 25,3 millionar kroner.
Året før var omsetninga 187,6 millionar, og resultatet før skatt beskjedne 1,1 millionar.

Britisk eigd

Bak tala for 2019 skjuler det seg at tre brønnbåtar som vart kjøpte i fjor, gjekk på leigeavtalar i første halvår.
I mai 2018 overtok det britiske finansselskapet Alchemy Special Opportunities 89,5 prosent av aksjane i Intership.
Gründerane Ole Peter Brandal eig 2,72 prosent i selskapet, Håvard Grøntvedt 1,44 prosent og Kjetil Opshaug 1,19 prosent, medan finansdirektør Geir Sandnes eig 0,39 prosent.