Børsdagen: Kurshopp før kvartalstal

Aksjekursen til Havila Kystruten steig med 9,22 prosent i dag, og gjorde selskapet til det av dei børsnoterte selskapa på Nordvestlandet som steig mest i kurs onsdag.

Kursoppgangen signaliserte forventingar til 3. kvartalstala, som styret i selskapet behandla onsdag, men som ikkje vart offentleggjorde før børsen stengte for dagen.

Havila Kystruten trafikkerer gods- og passasjerruta mellom Bergen og Kirkenes med fire fartøy.

I andre kvartal i år gjekk selskapet med pluss før av- og nedskrivingar (ebitda) for første gang. 

Artikkelen er oppdatert etter at Havila Kystruten-tala for 3. kvartal var klare.

Les børsmelding her 

I 3. kvartal var også driftsresultatet (ebit) positivt, og stort nok til å sikre eit overskot frå drifta også i årets i første månadar (sjå tabell).

Det er kombinasjonen av fleire reisande som betalar meir som er årsaka til veksten i inntekt og lønsemd: "Inntektsveksten drives av økt beleggsprosent, som steg til 78 % i tredje kvartal fra 70 % i samme periode i fjor, kombinert med høyere gjennomsnittlig lugarinntekt, som steg fra NOK 4 000 til NOK 5 200.", skriv selskapet i kvartalsrapporten.

I motsett ende av skalaen på børsen onsdag var Hav Group, som fall til 6,50 kroner aksjen. Det er ny botnnotering for selskapet.

Selskapa har til felles at begge har Havila Holding som største aksjonær, med høvesvis 25 prosent eigarandel i Hav Group og 50,96 prosent i Havila Kystruten.

Havila Holding er også aksjonær i Bakkar og Berg Media, som gir ut Nett No.