Døypte første vindskip frå Ålesund

Vard-verftet i Brattvåg kunne måndag invitere til dåpseremoni for Norwind sitt nye vindskip. Etter dåpen var det omvisning om bord for inviterte gjestar.

Skipet blir det første reindyrka vindskipet frå eit Ålesund-reiarlag. Tidlegare har Rem Offshore teke i bruk om bygde Rem Energy av reiarlaga på Sunnmøre.

Har arbeid til utover hausten
Skipet er blitt ferdig på berre seks månader fordi reiarlaget har eit oppdrag som ventar.

- Vi har sett alle klutar til for å bli ferdig og båten går i morgon over til britisk sokkel, fortel Norwind-sjef Svein Leon Aure til NETT NO.

Her skal skipet inn i arbeid med å bygge ut vindparken Hornsea 2 for Orsted. Ferdig utbygd vil vindparken på østkysten av Storbritannia vere verdas største.

Ifølgje Aure har skipet arbeid til «godt utover hausten», avhengig av kva opsjonar som blir gjennomført. Seinare har dei fleire moglegheiter, som gjer at reiarsjefen trur skipet vil ha jobb vidare også.

Skal også bygge fire nye skip
Norwind-fartøyet er ikkje eit nybygg, men ein ombygd PSV som no skal gå under namnet Norwind Breeze.

Skipet har tidlegare vore i operasjon i Asia og Australia, og har vore gjennom ein omfattande ombygging for å bli eit serviceskip for vindparkar til havs.

Nybyggingsprogramet inneheld også fire nye skip frå Vard-konsernet. To av desse blir utrusta av Vard-verft i Norge, og to ved Vard Vung Tau-verftet i Vietnam.

Tre Ålesund-familiar
Norwind Offshore blei starta i fjor. Reiarlaget bygger på staben frå Sverre Farstad & co, og held til i dei gamle Farstad-lokala på St. Olavs-plass i Ålesund.

Før helga melde reiarlaget at dei hadde fått med det danske investeringsfondet Navigare Capital Partners på ein emisjon i reiarlaget.

I tillegg til Sverre Anders Farstad og Sverre Olav Farstad, var Eivind Volstad og sonen Espen Volstad med på satsinga frå starten, begge med bakgrunn frå Volstad Shipping. Det var også Kleven-familien gjennom Maren Kleven Fox og Magnus Kleven. Begge er barna til Bunker Oil-eigar, Jan Magnus Kleven.